Islom sivilizatsiyasi markazi BAA delegatsiyasida katta taassurot qoldirdi

Oʻzbekiston Prezidenti Shavkat Mirziyoyev tashabbusi bilan barpo etilgan Islom sivilizatsiyasi markazi oʻzining ilmiy-maʼrifiy salohiyati, zamonaviy texnologiyalar bilan uygʻunlashtirilgan ekspozitsiyalari bilan dunyoning koʻplab nufuzli delegatsiyalarini oʻziga jalb etishda davom etmoqda.

Markazga Birlashgan Arab Amirliklarining yirik energetika kompaniyasi — “AMEA Power” boshqaruvi raisi Husseyn al Novays boshchiligidagi yuqori darajadagi delegatsiya tashrif buyurdi. Tashrif davomida mehmonlar Markazning arxitekturasi, noyob eksponatlari hamda sunʼiy intellekt asosida tayyorlangan interaktiv koʻrgazmalar bilan yaqindan tanishdilar. 

Delegatsiya aʼzolarida ayniqsa Markazning sunʼiy intellekt, 3D animatsiyalar, immersiv koʻrgazmalar va raqamli arxiv tizimlari asosida yaratilgan boʻlimlari katta taassurot qoldirdi.

Markaz boʻylab ekskursiya chogʻida Husseyn al Novays oʻz taassurotlarini chuqur hayajon va yuksak baho bilan ifoda etdi:

“Men bu ulugʻvor inshootdan chinakamiga hayratda qoldim. Bu yerda tarix oddiy tarzda namoyish etilmaydi — u jonlanadi. Markazda yaratilgan muhit insonni ming yilliklar qaʼriga qaytaradi. Ushbu ilmiy-maʼrifiy loyihani hayotga tatbiq etgan barcha mutaxassislarga chuqur hurmat va tahsin bildiraman — bu ulkan mehnat samarasi. 

Bugun men ilk bor shuni angladimki, men yaxshi bilgan, asarlarini oʻqigan koʻplab ilm va falsafa namoyandalari aslida Oʻzbekistondan yetishib chiqqan. Bu men uchun kutilmagan kashfiyot boʻldi. 

Men Oʻzbekiston Prezidentini ushbu ulkan tashabbus uchun chin dildan tabriklayman. Markaz — nafaqat Oʻzbekistonning, balki butun mintaqaning ilmiy-maʼrifiy boyligidir. Bu yerda amalga oshirilgan ishlar Oʻzbekistonning qanday yuksak rivojlanish bosqichiga chiqqanini yaqqol koʻrsatadi,” deya taʼkidladi Husseyn al Novays.

Ushbu yuksak baholar Markazning xalqaro ahamiyati, ilmiy-potensiali va madaniy diplomatiyadagi rolini yana bir bor namoyon etdi.

Markaz jahonning turli davlatlaridan kelayotgan mutaxassislar, diplomatlar va ilmiy doiralar vakillari uchun islom va oʻzbek sivilizatsiyasining noyob merosini zamonaviy yondashuvda oʻrganish imkonini berayotgan eng muhim maskanlardan biri boʻlib bormoqda.