Moʻgʻuliston delegatsiyasi Hazrati Usmon mushafiga yuksak ehtirom koʻrsatdi

Moʻgʻuliston delegatsiyasi Oʻzbekistondagi Islom sivilizatsiyasi markazi “Qurʼoni karim zali”da joylashtirilgan Hazrati Usmon mushafiga yuksak ehtirom koʻrsatdi. Bu umuminsoniy maʼnaviy qadriyatlarga sadoqatning yorqin namunasi boʻldi. Moʻgʻuliston delegatsiyasining Islom sivilizatsiyasi markaziga tashrifi sivilizatsiyalar oʻrtasidagi oʻzaro hurmat va muloqot gʻoyalarini yanada mustahkamladi.

Moʻgʻulistonning Ulan-Bator shahri gubernatori Xishgeye Nyambaatar boshchiligidagi delegatsiya Oʻzbekistondagi Islom sivilizatsiyasi markaziga tashrif buyurdi. Tashrif chogʻida mehmonlar Markazda namoyish etilayotgan tarixiy-maʼnaviy meros bilan tanishib, Qurʼon zalida saqlanayotgan muqaddas Hazrati Usmon mushafiga hurmat bajo keltirdilar.

Islom sivilizatsiyasi markazi Oʻzbekiston hududida shakllangan boy tarixiy, ilmiy va maʼnaviy merosni yaxlit konsepsiya asosida namoyon etayotgan, xalqaro ahamiyatga ega ilmiy-maʼrifiy maydon sifatida mehmonlarda katta taassurot qoldirdi.

Markaz bilan tanishar ekan, Ulan-Bator shahri gubernatori Xishgeye Nyambaatar majmuaning mazmuniy konsepsiyasi va keng qamrovli yondashuvini alohida taʼkidladi:

"Bu yerda tarix, diniy uygʻonish davrlari hamda ilm-fan rivoji oʻzaro uygʻun holda juda aniq va tushunarli tarzda yoritilgan. Bu maskanni haqiqiy sivilizatsiya markazi deb atash mumkin.

Bu ekspozitsiyalar orqali ilm va din taraqqiyoti bir-biri bilan uzviy bogʻliq ekanini yaqqol his qilish mumkin.

Markazga kirib kelar ekanman, Oʻzbekiston xalqi oʻzining qadimiy tarixi bilan birga, bugungi zamon tarixini ham oʻz qoʻli bilan yaratayotganiga guvoh boʻldim. Bu ayniqsa yosh avlodni vatanparvarlik ruhida tarbiyalashda muhim ahamiyatga ega.

Biz, moʻgʻulistonliklar, qadimdan barcha dinlarga chuqur hurmat bilan munosabatda boʻlib kelganmiz. Qurʼon — yuzlab million insonlar uchun muqaddas kitob. Unga hurmat koʻrsatish — umuminsoniy maʼnaviy qadriyatlarga boʻlgan ehtirom ifodasidir".