“Oʻzbekiston tarixini yanada chuqurroq anglashga muvaffaq boʻldim” – Xitoy Xalqaro kommunikatsiya markazi raisi

Xitoy Xalqaro kommunikatsiya markazi raisi Lun Yusyan boshchiligidagi delegatsiya Oʻzbekistondagi Islom sivilizatsiyasi markaziga navbatdagi tashrifida turli tarixiy davrlarni qamrab olgan ekspozitsiyalar bilan batafsil tanishdi.

Xitoy Xalqaro kommunikatsiya markazi raisi Lun Yusyan boshchiligidagi delegatsiya Oʻzbekistondagi Islom sivilizatsiyasi markaziga ikkinchi bor tashrif buyurdi.

Tashrif davomida mehmonlar markaz hududida yaratilgan sharoitlar hamda turli tarixiy davrlarni qamrab olgan ekspozitsiyalar bilan batafsil tanishdilar. Delegatsiya aʼzolarida Oʻzbekiston hududida shakllangan boy tarixiy va maʼnaviy merosning tushunarli va izchil tarzda yoritilgani ijobiy taassurot qoldirdi. Ekspozitsiyalarda tarixiy davrlarning ketma-ketlik asosida taqdim etilgani oʻtmish jarayonlarini yaxlit holda anglash imkonini beradi.

Mehmonlar Qurʼon zalidagi ekspozitsiyalarga alohida eʼtibor qaratdilar. Ushbu boʻlimda islom sivilizatsiyasining maʼnaviy asoslari, ilm-fan va maʼrifat bilan bogʻliq jihatlari ochiq va ravshan tarzda yoritilgan. Ekspozitsiyalar orqali islom madaniyatining insoniyat taraqqiyotida tutgan oʻrnini yanada chuqurroq anglash mumkin.

Xitoy Xalqaro kommunikatsiya markazi raisi Lun Yusyan markaz haqidagi taassurotlarini quyidagicha bayon etdi:

“Men Islom sivilizatsiyasi markaziga ikkinchi bor tashrif buyuryapman. Ilk tashrifim davomidayoq bu maskan menda juda chuqur taassurot qoldirgan edi. Oʻsha paytda vaqt cheklangani sababli barcha jihatlarni batafsil oʻrganish imkoni boʻlmagan. Bu safar esa Oʻzbekiston tarixini yanada chuqurroq anglashga muvaffaq boʻldim. Bu yerda tarixni asrab-avaylash va uni dunyoga yetkazish masalasiga katta eʼtibor qaratilgani yaqqol seziladi.”

Delegatsiya rahbarining taʼkidlashicha, Islom sivilizatsiyasi markazi shunchaki muzey emas, balki tarixni anglash, undan saboq olish va bu bilimlarni yosh avlodga yetkazishga xizmat qiladigan muhim maʼrifiy maskandir. Markaz faoliyati yoshlarning tarixga boʻlgan qiziqishini oshirish, madaniy muloqotni rivojlantirish va turli xalqlarni bir-biriga yaqinlashtirishga xizmat qiladi.

Mehmonlar fikricha, kelgusida turli sivilizatsiyalar va madaniyatlarga bagʻishlangan koʻrgazmalar tashkil etilishi markazning xalqaro ahamiyatini yanada oshiradi.